宿營

人生第一次宿營係小學六年級大宿營﹐前個排講起原來好多小學都會有﹐係指定動作。離家別井一去去五日﹐都咪話唔過癮。地點係長州(LONG ISLAND)﹐即係阿花成日去個度又即係好多賓客個度。哈哈﹗ 長州明輝營﹐去離島就點都好過去西貢﹐個人應為﹐因為鐘意港島。去到每人編排一個倉﹐每人一張床﹐準時準後有飯食﹐有天才表演﹐有燒烤﹐有集體寫信番屋企﹐有集體洗面﹐成排友仔﹐對住成排水龍頭係度洗面﹐除左石璧都無乜地方可以禁做。有集體早操。有集體行山﹐有集體去張保仔洞﹐就係去過一次禁大把﹐洞口細﹐肥姐應該入唔到﹐裡面有大量垃圾﹐香港特色。起碼叫做去過﹗

大個小小﹐人細鬼大﹐就同D中學同學去信和租度假屋﹐點揀都好就係唔揀長州﹐因為驚﹐驚遇到驚驚野。去過長沙﹐貝奧﹐呢D靚仔熱點﹐一上到三層船就緊係囉搭牌出黎消磨時間﹐一小時後到步﹐就個個自動自覺行去惠康買燒叉﹐燒乜燒物。之後就緊係趕唔切上巴士又或者逼人得濟上唔到﹐又要罰企一粒鐘等下班﹐好啦﹐上到巴士點解次次都可以無位坐既﹐因為逼囉﹐因為單層囉﹗經過D迂廻山路﹐終於到啦﹐正﹗去村口士多問賓妹囉匙先﹐搞惦﹐終於上房﹐嘩﹐點解係信和影出黎禁大﹐而家禁既﹖ 算數﹗之後既指定動作就係租單車﹐夜晚燒烤﹐有人玩牌﹐有人打牌﹐出海灘打排球﹐浸LEG﹐吹水﹐睇女仔等等﹐各式其式。

又去過一個叫澄碧村既地方﹐如果各下係80‘S既人應該會睇過陳慧嫻既跳舞街MV﹐又或者老餅麟既情義兩心知MV﹐無錯啦﹐就係D屋一排排﹐個頂橙色幾靚下個度啦﹗如果重唔識就算啦﹗因為真係唔係禁多人去過。一個類似魚景灣既地方﹐你可以玩游水﹐TENNIS﹐藍球﹐打遊戲機﹐焗桑拿。發展商其實好想搞好拒﹐但係耐何人流唔夠﹐日久失修﹐後尾重要張D屋囉黎賣。唔知而家重有無呢﹖呢到又令我諗起令一度地方﹐北海魚村橋嘴島。

黎到北美宿營係時有發生既﹐因為你去第二個州探人﹐探親戚﹐個D咪就係宿營囉﹗