教育電視

我除左用左大半生既時間去研究物質學﹐人性學之外﹐都用左唔小時間係電視節目研究上面﹐教育電視係人生都佔左一席位。教育電視係由小一到中三既﹐拒係香港電臺教育電視部主理既。記得係教育電視裡面出現過既演員有魏俊傑﹐王書棋﹐鄧一咩﹐拒個時重係好細個﹐重係肥仔一名﹐帶眼警。又有郭德信同埋丁茵。我小學既時候係睇錄影帶版既教育電視﹐即係唔係現場個隻﹐緊係啦﹐校長編堂好難夾到D節目家嗎。但係有D學校都編到既。我地會三十人坐埋入間房仔地下係到睇帶﹐又試過係自己班房睇現場版。D老師一下唔覺意開到無線﹐亞視﹐班友仔就會起哄﹐係到嘩嘩聲﹐又話不如唔好轉臺。個時係明豬臺同國際台播既﹐一人半日﹐無多無小。最好笑係一到上下晝班放學既時候﹐個臺會整幅卡通畫﹐係畫住D細路放學既。

等我同大家研究下一D深刻既內容啦。我自己就比較鐘意睇健教﹐社會呢D同生活識識相關既題材。好似有一集健教有條友岩岩打完波﹐身水身汗番到屋企係到吹風扇﹐個阿媽就係到叫明仔呀﹐你岩岩番黎唔好即刻吹風扇呀﹐禁好易病架。禁個條友就緊係唔聽阿媽話﹐賴野架啦。

又有一集講雪櫃﹐話要將D食物分門別類禁擺﹐又要記得唔好煮過多分量既餸﹐禁咪唔使食淨料囉。笑死﹐鬼唔知咩。岩阿媽睇多D個集。

又有集講消化系統﹐整左好鬼多卡紙道具器官﹐識郁既﹐扮人講野﹐好似有胃呀﹐口腔呀﹐食道等等﹐個條友食野唔趙爛就吞。搞到個胃投訴D牙﹐D牙又堆番比個胃﹐十分抵死。

英文既教育電視其實都好好笑。成日影住個口﹐重複讀音﹐又必必聲。

講到最爭議性既一定係六年級講青春期個幾集野﹐個個細路睇到津津有味﹐一見到D大膽畫面就係到笑笑笑。