一城的日子

追塑番去我小學既年代﹐當時我重係好乖乖牌﹐唔喜歡搞事﹐日日番學放學﹐中午自己坐羅叔叔架保母車番歸﹐自己禁飯煲仔焗隔夜飯食﹐食住睇婦女生資(重未變都市閒情﹐未有彩玉)﹐教育電視﹐一貫悠然自得﹐做下功課﹐夜晚830做劉華既楊過已經上床訓覺﹐無得睇拒點練玉女心經﹐因為第二朝又要晨做起身番學。

個時沙田係一個新市鎮﹐每次係九龍棠坐城巴番屋企﹐經過獅山隧道去到沙田都有浸涼風送埋黎﹐好舒服﹐後尾越多人就無啦﹐當然。途經獅山郊野公園﹐細個都好想行下﹐但係到學校帶我地去既時候﹐我已經係高年班﹐要去香港仔郊野公園。途經又會見到紅梅谷個圓圈﹐曾大屋﹐一渣屋村﹐最尾以一城為終點站。

我係住一﹐二期既﹐一路住到拒起晒為止先搬﹐咁大個屋園﹐當然會有好多人住﹐好似之前提過我兒時既偶像賈思樂﹐就因為幫過我搬單車而令我封拒為偶像。後來我老豆同朋友係一城睇樓﹐重見到阿羅樂林添﹐因為就係拒放盤。

之後姻緣際會又識到阿歐陽睡眠﹐同拒一齊係一城泳池游水﹐點鬼知拒而家做埋無線添呢。係個度住既同學並唔係太多﹐同我最FRIEND個個就同我日日坐保母車﹐中秋煲蠟﹐游水﹐踩單車﹐我個時買左部世嘉﹐拒有任天強﹐重有DOCTOR添﹐所以多數去拒到玩。

咁大屋園自然會有熟人住﹐好似有我老師阿洪SIR咁﹐就係住係個度﹐不過細個都幾怕同老豆阿媽見到D阿SIR﹐MISSY﹐因為驚拒唔知係我老豆面前講我乜﹐但係我個時根本係個乖仔﹐怕乜遮﹐細膽。

住左好幾年個度都好平靜﹐好安全﹐無乜恐怖野發生過﹐但係終於係某年某月既一個星期日﹐早上八點鐘﹐好深刻﹐一聲巨響﹐搞到全一城既人醒晒﹐原來係格黎一座某單為發生媒氣噤鐘爆炸﹐當時好震撼﹐我走左去阿媽間房﹐之後就聽到好多WE WU車聲﹐事後原來係有人開媒氣係屋企自殺﹐有電器令到大爆炸﹐重有兩部冷氣機飛左落街添﹐重整瓜地面兩件添﹐真係得人驚﹐我屋企望唔到﹐有人望到話好恐怖﹐所以我以後都唔敢係個到行過同埋係個公園仔玩。

係個個年代係7仔重出過一隻叫餸菜包既野﹐係陶大出既﹐唔係好多人知﹐因為唔係間間都有﹐拒既原意係想當時既師奶唔使日日掛住買咩餸而煩腦﹐每日拒有不同既餐單﹐之後個餸菜包就擺係7仔賣﹐裡面有3餸一湯﹐材料預備晒﹐個師奶一買番去可以即煮﹐我阿媽都試過好多餐﹐發覺都唔錯﹐但係分量少D﹐你知我食成碟菜架啦﹐點夠食遮﹐陶大終於賣左一個月度﹐之後無埋。

係一城拍過既戲都唔少﹐好似有最佳拍擋﹐同埋聖誕奇遇結良緣﹐阿LAM﹐張曼玉做既﹐當時德寶公司拒地係臨時街市隔黎起左好大個假遊樂場﹐我先頭都唔知咩事﹐以為有野玩﹐後尾先知拒地係到拍戲。