無名髮

潮流興搞個頭﹐華頭都變LV HELMET頭﹐價值連城﹐買都買唔番﹐講番我自己個頭﹐細個老豆錫我所以多數帶我去尖嘴海洋中心類似上海鋪既髮廊剪﹐混1號﹐2號﹐個師父有D似馮粹帆﹐好高好瘦﹐去到見我實囉塊板墊上張凳到﹐因為我唔夠高丫嗎。頭毛唔算多﹐通常兩野搞惦﹐但係我又幾鐘意飛髮架喎﹐有人搞下我個頭﹐幾舒服。

大個少少老豆發覺既然頭毛不多﹐不如索性自己黎啦﹐剪下剪下﹐都有不錯既效果。老豆個膽開始越黎越大﹐開始有D新嘗試﹐當然會有失敗既時候﹐唯有洗多幾次頭﹐等拒快D長番出黎。

之後食散餐既日子又黎啦﹐老豆剪下﹐出去又剪下﹐深水埗﹐沙田﹐馬鞍山﹐大圍﹐荃灣試過晒﹐通常見到70-80蚊既都會試下﹐係正常價錢。試過係第一城有個師父﹐拒唔係幫我剪左好多頭髮既﹐但係拒之後幫我用左好多JEL﹐JEL左一個到今時今日我都覺得幾好既髮型﹐好哽下﹐但係好型﹐我以後都整唔番﹐個晚重同阿媽去拒老細屋企食飯添﹐無失禮人。

係大圍既時候﹐係阿媽既PUSH介下﹐介紹左蘇民峰師父我認識﹐剪得唔錯﹐拒條辨仔都好型﹐所以我人生第一次電髮都交托比拒﹐個種電髮叫做電彈力﹐意思係等個頭望落好似鬆厚D禁﹐好似形容緊D SUPREME PIZZA禁。整完番去比老豆鬧﹐話男仔電乜鬼髮呢。

又試過想當年好興南哥既時代﹐身邊友人袁文傑整左個南哥古惑長頭﹐我都留過﹐不過當然唔禁太長﹐到後來志雄﹐兆基都引退既時候不了了之。

幾年前開始揀我屋企二號師父阿媽﹐因為拒D水準穩定少少。再後來過到黎美國試過強人街一間野﹐直剷我兩邊﹐個頭大陸到不能再大陸了﹐影響左我潮流教父既名聲。索性留長﹐到左前兩年重遇阿爸既時候﹐把心一橫﹐黎個突破少年﹐SKINHEAD﹐原用至今。

其實我個頭係非常難剪既﹐因為有D頭髮倒生既關係﹐唔得順﹐唔貼頭。

成日凝住個D金毛幫你洗頭既時候﹐靚女會洗耐D﹐男仔會求其洗﹐重會係你洗緊頭既時候同拒格黎個同事做出一個不滿既表情﹐雖然我睇唔到。

菜頭衰難剪﹐我卻愛洗錢。