神州行

其實想講大陸既生活好耐架啦﹐但係唔知由邊度開始講起好﹐都係以一段一段有趣既事禁寫啦。

禁我本身就未番過自己鄉下既﹐但係屋企人個時就有個私竇係中山﹐所以我每逢學校有假期就會同屋企人番去住下﹐玩下。其實我就唔係去過好多大陸地方﹐都係以廣東為主。同香港一水之隔既中山﹐可以坐快船一個多小時就會到﹐大陸其實同落後左既美國差唔多﹐都係地大﹐如果無車都真係幾唔方便﹐下下坐的士﹐坐公車都可以既﹐但係你每次番去拿住禁鬼多野﹐點搭巴士呀﹐況且我地D衣著一看就知唔係本地人﹐搭巴士危險D囉。當我放低晒D行裝都會坐下巴士既﹐但係D巴士又係好似美國禁﹐唔密﹐美國都重好D﹐好準時﹐但係大陸呢﹐唔準時﹐D巴士重要超晒載﹐超載既情況係好恐怖個隻﹐好似晨早香港地鐵禁多人﹐好彩我上車既地方係總站﹐所以每次都有位坐。

又講下電壓﹐禁你知大陸既能源未必會好似美國禁完善﹐我住個度﹐每間房就已經有冷氣﹐但係如果你要開晒拒呢﹐又唔可能﹐因為隨時D電壓會頂唔順﹐跳制﹐又要混人黎開﹐我試過訓訓下冷氣停左﹐熱醒﹐要混人黎開番制﹐零晨都整得番﹐算好彩。

禁又唔好睇大陸好似乜都落後喎﹐你知廣東沿岸都係睇無線﹐亞視架啦﹐但係拒地收到既未必係真正係香港既電視訊號﹐因為有D地方都好遠下﹐而拒地就係靠本身當地既鎮政府用一條大天線黎收發訊號既﹐我住個度就係啦﹐逢無線賣廣告個時﹐拒地會CUT左無線既廣告﹐播當地既廣告﹐每年農曆新年重有當地鎮長(唔係姨丈)同大家講話添﹐真係正﹐好似香港電臺叫彭定康講新年賀詞禁。

而我覺得最先進既地方係有一個點唱台﹐個版面就好似去KARAOKE 點唱禁﹐有好多野揀﹐你只要打電視上面個電話﹐接通左﹐你就可以用聽筒禁你想點隻SONG﹐完全係不經人手﹐全自動﹐真先進。講緊既係8-9 年前喎。可能而家有戲播添。

又講下係當地街市買餸﹐當然唔能夠同韓阿材雙題並論﹐大陸既街市就好早開既﹐重有D地方有墟市添﹐係墟度﹐乜野都有得賣﹐假海味呀﹐真海味呀﹐古豌呀﹐衫呀﹐真係乜都有。墟就唔係日日有既﹐逢初一﹐十五先有。講番買餸﹐街市就下晝水靜餓飛既﹐你要買都可以﹐但係無乜野揀囉。因為D街市都好簡漏﹐未必有雪櫃﹐試過下晝去買舊牛肉﹐個牛肉佬會聞下舊牛肉先切比你﹐驚變左阿嗎。呢個算有良心﹐因為都試過買左番去先知道係臭既。真係無陰功。

又有一次同MARK LUI姨丈去清遠﹐導遊就帶我地去個溫泉﹐我一去到﹐已經比D設備嚇親﹐你知我呢D笑爺仔好厭尖架嗎﹐見到個溫泉D水係啡啡黃黃﹐男男女女都照落去﹐但係D水又淺喎。重要我另外比錢浸﹐勢係假﹐拒地就一場黎到點都試下﹐我就一條友仔係出面等﹐玩相機﹐阿MARK LUI 都知我為人﹐所以都無逼我落去。

係香港玩煙花就唔得既﹐係大陸自自然然多D機會﹐玩龍吐珠﹐一支長野﹐裡面有十幾粒煙花﹐用手拿住係度放﹐細個怕死﹐大力渣住﹐渣爆左中間﹐煙花係中間個窿反彈落我隻手度﹐賴晒野。後尾查豉油﹐而家重有少少印。飛機仔另一驚驚煙花﹐唔使渣住﹐但係點左要即走﹐就圍彈﹐亂禁飛。爆丈﹐一大串﹐二樓吊落黎﹐燒足幾分鐘﹐之後掃地掃親死。